Sakop ni Sumabong nadakpan sa Bogo

CEBU, Philippines - Giilang level 3 drug pusher ug gitumbok nga notadong sakop sa gun for hire sa dakbayan sa Bogo nasikop sa operasyon sa Provincial Intelligence Branch (PIB) sa Cebu Provincial Police Office (CPPO) ug Bogo City Police.

Gibutyag ni Senior Inspector Leo Logronio, sa PIB-CPPO ang operasyon gihimo batok ni Glenn Cadlawon, 20, residente sa barangay Gairan, dakbayan sa Bogo.

Matud pa ni Logronio, si Cadlawon, bata-bata kaniadto ni Joel Sumabong nga naila usab nga tigpayuhot og drugas sa maong dakbayan nga natanggong na karon sa prisohan ug karon si Cadlawon na maoy nagdala sa negosyo sa ilang amo.

Ang grupo gikatahong makabaligya og 100 gramos nga shabu matag semana dili lang ang Bogo City apan lakip na sa mga silingang lugar sama sa San Remegio, Isla sa Bantayan ug Medellin.

Nasayran nga gawas sa pagpamaligya og illegal nga drugas, nalambigit usab sa pagpanulis ang grupo ug modawat usab og gun for hire service kun adunay mokuha kanila. Ang dinakpan miangkon nga iyaha ang 48 gramos nga drugas nga nakuha nga nagkantidad og P.5 milyon.

Apan iyang gihimakak nga iya ang mga armas nga nakuha naglangkob sa .38 nga revolver, kalibre .45 ug usa ka 9mm pistol kay matud niya giprenda lang kini ngadto niya  ug dili siya gun for hire.  (BANAT NEWS)