CEBU, Philippines - Duha ka kawani sa Coastal Management Board (CMB) ug Bantay Dagat Commission (BDC) sa dakbayan sa Sugbo ang niangkon nga sila tiggamitan og gidili nga drugas.
Niadtong adlaw nga Martes nagpahigayon og surprise drug test ang Cebu City Office for Substance Abuse Prevention (COSAP) sa 29 ka kawani sa BDC ug siyam sa CMB.
Matud sa pangulo sa COSAP nga si Dr. Alice Utlang ilang gipaubos ang mga kawani tungod kay nakadawat sila og reklamo nga adunay mga gidudahang tiggamitan og gidili nga drugas sa maong mga buhatan.
Ang mga niangkon gitanyagan sa COSAP nga mopaubos sa programa sa Department of Social Welfare and Services (DSWS) nga out patient rehabilitation program.
Hinuon walay nagpositibo sa mga gipaubos sa drug test niadtong Martes sa tanan nga kawani sa CMB ug BDC.
Base sa talaan sa COSAP karon tuiga mas nisaka na ngadto sa 46 ka mga kawani ang nagpositibo ug pito ang niangkon. (BANAT NEWS)