CEBU, Philippines – Nangayo og dugang usbaw sa ilang honorarium ang Federation of Lupong Tagapamayapa sa Siyudad sa Talisay ngadto sa konseho atol sa sesyon kagahapon.
Si Rolando Cellan, presidente sa maong grupo ang nibarog sa hawanan sa konseho ug mipadayag sa ilang sentimiyento tungod kay para niya angayan sila nga mahatagan og saktong benepisyo sama sa mga barangay tanod ug barangay health workers.
"Kami mga frontliner usab baya mi. Mahapsay ang usa ka barangay tungod sa among presensiya kay kami man ang mohusay matag adunay away," matud pa ni Cellan.
Ang grupo sa lupon sa Talisay ang moabot sa 200 ka mga miyembro sud sa 22 ka barangay sa siyudad. Asoy pa ni Cellan nga dili manag pareha ang sweldo nila tungod kay magdepende man kini sa barangay.
Siya nagkanayon nga kung gamay nga barangay ang gisilbihan sa lupon hayan gamay ra usab ang ilang madawat gikan sa barangay sama sa Barangay Tapul, Manipis ug Maghaway nga magdawatan lang og 50 matag buwan.
Gusto niya nga sila, mga tanod ug BHW hatagan usab unya sa P500 matag buwan.
Hinuon si Bise Mayor Romeo Villarante ang miduso na sa maong hangyo sa chairman sa committee on finance aron kini matan-aw kung pwede ba nga magahinan og pundo.
Si Konsehal Richard Francis "Choy" Aznar kinsa maoy majority floor leader misaysay nga kinahanglan nga himoan nila kini og ordinansa aron nga maapil nila sa sunod tuig nga Annual Investment Plan. – /EIM) (BANAT NEWS)