CEBU, Philippines – Magpabilin gihapon ang two-way traffic lane sa dalan C. Padilla, San Nicolas Proper, dakbayan sa Sugbo, duol sa Don Carlos A. Gothong Memorial National High School bisan pa man sa hangyo sa mga opisyal sa barangay nga gipadangat sa Cebu City Transportation Office.
Base sa barangay resolution, ang paghimo og two-way sa dalan nga duol sa eskwelahan naghatag og kakuyaw ug risgo ngadto sa mga tinun-an, tungod kay pipila na ka higayun nga adunay mga estudyante ang naigo sa mga sakyanan.
Nahukman nga hangyuon ang CCTO nga ibalik sa one-way ang mao’ng lugar.
Apan si Atty. Rey Gealon, pangulo sa CCTO, nibutyag nga magpabilin gihapon ang two-way traffic lane sa lugar ug ipatuman kung unsa’y nakalagda sa balaud aron magpabiling hapsay ang lugar.
Sumala pa ni Gealon, ang maong lugar, gi-design nga two-way traffic ug makahatag usab kini og kaayuhan labi na sa publiko nga moagi sa lugar. Giklaro usab ni Gealon nga mas hinay modagan ang mga sakyanan sa two-way lane kaysa one-way lane. – /GMR) (BANAT NEWS)