CEBU, Philippines – Patay na nga nalandig sa tambalanan ang usa ka negosyante nga kaubang nagkaon sa iyang asawa diha sa Carbon Public Market human kini gipusil sa wa mailhing mga tawo pasado alas 7 niadtong Lunes.
Ang maong lalaki naila nga si Genaro Subing-Subing, 48, taga Mercado Compound, barangay Punta Princesa sa dakbayan sa Sugbo.
Base sa imbestigasyon sa kapolisan nga ang biktima kauban sa iyang asawa didto sa ilang tindahan sa Carbon.
Pasado alas 7 sa gabii ang magtiayon mikaon sa ilang panihapon apan samtang nag-estorya sila kalit lang may duha ka lalaki nga nagsakay og motor ang miabot.
Nagtuo sila nga adunay paliton ang duha kay diha man nihunong sa atubangan sa ilang tindahan.
Ang angkas sa motor miduol ngadto sa tindahan ug kalit nga mibunot sa wala pa matino nga kalibre sa armas ug gipusil ang ulo sa biktima.
Naigo sa iyang tuong apapangig ang biktima ug natumba sa yuta samtang ang mitira kaniya daling midagan paingon sa motor dayong sibat.
Daling gidala sa Cebu City Medical Center ang biktima apan gideklarar na kini nga dead on arrival.
Gituohan sa kapolisan nga adunay nakabikil ang biktima ug gisusi na nila karon ang mga kalihokan niini sa nangaging mga adlaw. – /EIM) (BANAT NEWS)