CEBU, Philippines – Gidakop sa kapolisan ang usa ka minor de edad nga lalaki nga nasigpatan sa nagpatrolya nga kapolisan sa lungsod sa Consolacion nga nagsakay og motorsiklo nga wala mag-helmet alas 3 pasado sa niagi’ng kadlawon sa barangay Poblacion Occidental.
Diha’ng girekisa nakuhaan usab kini og linikit nga pinaugang dahon sa marijuana.
Si Police Officer 1 Retchie Guilleran sa Consolacion Police Station niingon nga ang team nga gipangulohan ni Police Officer 2 Glender Cabañero ug mga kauban ang nagpatrolya sa tibuok dapit sa barangay Poblacion Occidental diin ila’ng nasugatan ang minor de edad.
Gumikan kay wala man mag-helmet ila’ng gipahunong ug gipangayoan og lisensiya ug rehistro sa gidala nga motorsiklo.
Napakyas sa pagpakita og lisensiya ug rehistro ang minor de edad nga nakaaghat kanila sa pagrekisa sa kalawasan ug ila’ng nakuha ang pinauga’ng dahon sa marijuana nga gilikit sulod sa bulsa niini. Ang dinakpan ila’ng gitanggong ug gipaabot ang mga ginikanan nga mopatim-aw alang sa tukma’ng lakang nga pagahimuon. - /GMR) (BANAT NEWS)