CEBU, Philippines – Nisudlot ang mata sa tindero og isda human kini gidunggab sa iya’ng bayaw sa ila’ng panimaye sa barangay Candulawan, dakbayan sa Talisay niadto’ng Domingo sa gabii.
Ang biktima mao si Jerome Cardines, 39, minyo nga nagpuyo sa nahisgutang lugar.
Ang suspek mao ang iya’ng bayaw nga si Jude Talara, 29, ulitawo.
Si SPO1 Yvonne Ilustrisimo, imbestigador sa Talisay City Police, nibutyag sa Banat News nga ang biktima nisukmat sa suspek kabahin sa iya’ng kwarta nga nawagtang.
Ang biktima nipasangil sa iya’ng bayaw nga nangawat hinungdan sa ila’ng panaglalis.
Napungot ang suspek ug nikuha sa flat screw dayun dunggab sa wala’ng mata sa biktima.
Matud ni Ilustrisimo nga nilugwa ang mata sa biktima human sa pagdunggab.
"Nisudlot gyud ang eyeball sa biktima gumikan sa pwersa pagduot sa flat screw," matud ni Ilustrisimo.
Dali’ng gitabang ang biktima pinaagi sa pagdala niini sa tambalanan. Hinuon ang suspek ang gidakop sa mga opisyal sa barangay ug gi-turnover sa kapolisan.
Gikatakda’ng pasakaan og kaso’ng frustrated murder ang suspek. - /GMR) (BANAT NEWS)