CEBU, Philippines – Hapit nawad-an og halos P174,000 nga kantidad sa mahalong camera ug kagamitan ang usa ka photographer human kini mabiktima sa “salisi gang” samtang sulod sa usa ka hotel sa Kasambagan, dakbayan sa Sugbo sa niagi’ng gabii.
Ang biktima nga si Clint Caingles, 30, usa ka personal photographer nga nagpuyo sa Sambag 1 ang nabiktima sa upat ka gituohang miyembro sa “salisi gang” alas 8 sa gabii niadto’ng Sabado.
Matud ni Caingles nga naghuwat siya sa iya’ng driver sa lobby sa hotel ug iya’ng gibutang sa lamesa nga anaa ra sa iya’ng atubangan ang iya’ng bag nga adunay sulod nga mahalon nga camera ug iya’ng laptop samtang siya nilingkod sa lingkuranan nga dili layo kaayo gikan sa lamesa.
Apan sa pagtan-aw niya og balik, wala na ang iya’ng camera bag ug ang nahibilin ang iya na lang laptop bag mao nga dali siya nga nisumbong sa management sa hotel.
Matud pa nga sa ila’ng pagtan-aw sa CCTV camera, didto nakita nga adunay upat ka tawo, tulo ka babaye ug usa ka lalaki, ang nagtinabangay aron makuha ang bag sa biktima.
Ang usa sa mga babaye nitindog atubangan ni Caingles aron maalihan ang iyang panan-aw sa iya’ng mga gamit samtang ang uban nga kauban niini mao’y nikuha sa camera bag ni Caingles.
Tungod niini, ni-report ang biktima sa Theft and Robbery Section sa Cebu City Police Office ug iya’ng gisaysay ang panghitabo.
Apan matud ni Caingles nga wala pa siya makontento ug niduol siya sa Mandaue City Police Office.
Sigun ni Caingles nga ang mga kawani sa MCPO nakaila sa mga dagway nga nakuhaan sa CCTV mao nga ila kini’ng giadto sa panimalay kagahapon sa hapon.
Hinuon gibalik sa mga kawatan ang mga gamit ni Caingles sa kondisyon nga dili na lang siya mopasaka og kaso.
Apan matud sa biktima nga naghunahuna gihapon siya kung mopasaka ba o dili batok sa mga suspek. - /GMR) (BANAT NEWS)