CEBU, Philippines – Gihangyo sa Hunta Probinsyal sa Sugbo ang kapolisan nga pabantayan ug pabutangan og barbed wires ang duha ka mga taytayan nga nagkonektar sa Mandaue City ug Lapu-Lapu City aron malikayan ang mga insidente sa paghikog sa maong dapit.
Kini human naalarma na ang Mactan-Cebu Bridge Management Board sa nahitabong insidente niini lang buwana nga diin milayat ang usa ka babaye hinungdan sa iyang kamatayon.
Matud pa nga tungod sa gihabugon sa maong mga taytayan nahimo na kining lugar alang sa mga gustong maghikog.
Ang Mactan-Mandaue Bridge adunay gitas-on nga 846-meter ug 9-metros ang gilapdon ug gidesinyo nga box truss bridge. Natukod kini usa ka tuig human nakuha sa Mandaue ang charter isip usa ka siyudad niadtong panahon ni kanhi presidente Ferdinand Marcos.
Gisugdan kini pagtukod niadtong 1970 ug natapos sa tuig 1972 nga gigastohan og P65 milyones. Kini gidesinyo ug gitrabaho pagtukod sa mga Pilipino nga engineers.
Samtang ang Marcelo Fernan Bridge nga usa ka cable-stayed bridge nga nagkonektar gihapon sa Mandaue ug Lapu-Lapu adunay gitas-on nga 1,237 metros ug aduna kini four lane nga dalan, opisyal kining gibuksan niadtong 1999.
Ang duha ka taytayan maoy tabokanan sa mga tawo sa nag-uwang nga Mactan Channel.
Apan tungod sa kalugak sa mga safety features gikan sa mga tawong gustong maghikog, daghan nang mga kaso niini ang nahitabo sa duha ka taytayan.
Tungod niini angay lamang pabantayan kanunay ang maong dapit aron dili na mahitabo ang susamang mga insidente.
Gihangyo usab sa Hunta ang lokal nga pangagamhanan sa mga siyudad sa Mandaue ug Lapu-Lapu nga tun-an ang pagbutang og tag-as nga razor barbed wires nga mga koral aron di na masayon-sayon pagpatong sa mga tawong dunay dautang tuyo sa ilang kinabuhi. - /EIM) (BANAT NEWS)