CEBU, Philippines – Dili lang ang mga Sitoy ang mag-atbang sa pagka-mayor sa lungsod sa Cordova human usa ka 23-anyos nga negosyante ang makigsakbang sa pamilya.
Si Paul Villaber niduso sa iya’ng certificate of candidacy niadto’ng Biyernes sa hapon kuyog sa iya’ng runningmate nga si kanhi konsehal Edwina Premacio ubos sa Kilusang Bagong Lipunan (KBL) samtang wala sila’y mga konsehal.
“Unta makahatag unta ko sa ako’ng contribution nga mo-asenso ang usa ka munisipyo nga akong nakit-an na na-deprive og opportunity, mura’g dili ma-tap niya ang mga potentials ba, great honor for me to be part of future history of this municipality,” matud ni Villaber.
Matud ni Villaber nga may bag-ong kapilian ang taga Cordova ug dili lang tali nila’ng Bokal Arleigh Jay Sitoy ug sa iya’ng igsuon nga si Bise Mayor Mary Therese Sitoy-Cho sa pagka-mayor.
Sa iya’ng COC gibutyag ni Villaber nga nagpuyo siya sa Plaza St. Zone 3, Poblacion, Cordova duha ka tuig hangtud sa May 9, 2016 nga eleksiyon.
Si Villaber anak ni Pablo Villaber, ang president ug chief executive officer sa Malayan Integrated Industries Corporation (MIIC), nga mao’y original nga nagduso sa Cordova Reclamation and Development Project (CRDP) nga giingong gibabagan sa mga Sitoy pabor sa SM Prime Holdings, Inc. (SPMHI).
Ang amahan malaumon nga mapatuman na ang proyekto ug makahatag og benepisyo sa taga Cordova kung mapili’ng mayor ang iya’ng anak. (BANAT NEWS)