CEBU, Philippines - Patay’ng lawas sa wa pa mailhing lalaki nga gituohang gipusil dayon gipaligid paubos sa bakilid sa awaaw nga bahin sa barangay Tulo-Tulo, Lungsod sa Consolacion napalgan kagahapon sa buntag.
Si Police Officer 1 Ritchie Guilleran sa Consolacion Police Station miingon nga ang patay’ng lawas gibanabanang anaa sa 30 kapin ang panuigon ug kasarangan lamang ang gidak-on sa panglawas.
Napalgan kini nga nagbuy-od sa dulhogon nga bahin sa lugar dapit sa kasagbotan.
Napalgan usab sa mga polis ang usa ka giabandonar nga motorsiklo napulo ka metros gikan sa gilabayan sa biktima , apan walay rehistro nga nakita gikan sa motor.
Usa ka babayeng residente maoy nakakaplag sa patay’ng lawas ug dali kini niyang gipahibalo ngadto sa ilang mga silingan ug maoy mitawag sa mga otoridad.
Matud pa ni Guilleran, ang mga residente nakadungog og duha ka mga buto sa armas pasado alas-3 sa kaadlawon.
Gituohan nga dili lumolupyo sa maong dapit ang maong lalaki ug gidala kini sa dapit aron lang patyon.
Duha ka anggulo ang gitan-aw sa mga polis sa kamatayon niini nga naglakip sa personal nga bikil ug sa kalambigitan sa ilegal nga drugas. (Romeo T. Limpangog/EIM)(BANAT NEWS)