CEBU, Philippines - Upat ka tawo ang naangol lakip ang duha ka bata human natumbahan og punoan sa Acacia ang ilang mga balay diha sa sitio Dapdap, barangay Kalunasan ning dakbayan sa Sugbo kagahapon sa hapon.
Ang nangaangol mao ang tulo ka buwang mabdos nga si Mylen Arevato, 33, anak niining si Erika,3, Kimberly Espinili, 20, kinsa maoy nagrabehan ug ang anak niini John Cyrus, 4.
Matud pa ni Franzel Goc-ong, sa Monares Enterprises nitawag kaniya si Elvie Bustillo silingan sa mga biktima kay nangayo og tabang kay dunay upat ka tawo nga ang nadat-ogan sa punoan sa Acacia.
Dali silang nipahibalo sa mga otoridad sa hitabo ug nipadala og sakyanan sa maong lugar tungod kay layo ang dapit nga nahitaboan ug moagi pa og sapa.
Usa sa mga biktima nga si Mylen, miingon nga kalit kaayo ang hitabo apan nabantayan niya nga kusog ang hangin nianang orasa ug pipila ka gutlo dunay kusog kaayo nga lagubo kay natumba kanila ang kahoy.
Si konsehal Dave Tumulak , pangulo sa Cebu City Disaster Risk Reduction and Management Council, kinsa niresponde sa dapit subling nipahimangno sa katawhan nga mag-amping kanunay karong nagsige og dautan ang panahon.
Adto una mopasilong ang mga naapektahan sa barangay hall samtang hawanan pa karong adlawa ang natumbang kahoy.
Ang mga biktima gidala sa managlahing tambalanan samtang mohatag ang siyudad ug ang barangay og pasiunang tabang ngadto sa mga biktima. (BANAT NEWS)