Paghawan sa Doña Pepang Cemetery gipadayon

CEBU, Philippines – Nagpadayon ang paghawan sa Doña Pepang Cemetery ug 20 ka pantiyon ang gilimpyohan sa Prevention, Restoration, Order, Beautification, Enhancement (PROBE) Team, kini subay sa pag-develop sa Heritage Site sa Dakbayan sa Sugbo.

Matud sa pangulo sa PROBE nga si Raquel Arce gawas sa mga pantiyon aduna usab 20 ka panimalay sa mga illegal settlers nga naa sa gawas sa sam-ang nga kinahanglang gub-on.

Sud sa sam-ang aduna nay 40 ka estraktura nga gikatakda nang daan nga panggub-on.

Si Division of Welfare for Urban Poor Atty. Collin Rosell nagkanayon nga boluntaryo na hinuong giguba sa mga tag-iya sa panimalay diha sa gawas sa sam-ang ang ilang mga balay.

“Cemetery is not a place for the living,” matud ni Rosell kinsa midugang nga wa nay gamit ang mga nitso kay wa nay mga sulod ug gihimo na hinuong katulganan sa mga tawo.

Gitambagan ni Rosell ang mga gipapahawa nga pabalhinon na sila sa relocation site nga gitagana sa siyudad nga nahimutang sa barangay Lorega-San Miguel.(Sheriza Mae Uy/EIM)

JRG Halad Foundation Mass Wedding

screening himuon karong Oktubre 24

Magsugod na og screening sa mga paresang buot magpakasal ubos sa JRG Halad Foundation Mass Wedding nga gitakda karong Pebrero 2016.

Ang screening himuon karong Sabado, Oktubre 24, sa alas- 8 sa buntag hangtud alas- 12 sa udto diha sa University of the Visayas Gym.

Ang mga kabus nga paresan nga nagpuyo-puyo ug kadtong mga kasado sa huwes o sibil nga gustong magpakasal sa simbahan apan walay ikagasto giawhag nga mosalmot niining maong kalihokan.

Ang mga rekisitos:

1. Original Birth Certificate (Photocopy of the original may be submitted)

2. Baptismal Certificate (Purpose to be indicated-MARRIAGE)

3. Confirmation Certificate (Purpose to be indicated-MARRIAGE)

4. Cedula

5. Original CENOMAR

Alang niadtong mga  kasado sa sibil:

1. Original Photocopy of marriage contract

2. Baptismal Certificate (Purpose to be indicated-MARRIAGE)

3. Confirmation Certificate (Purpose to be indicated-MARRIAGE)

4. Cedula

Alang sa mga interesadong magpakasal sa simbahan nga pasiugdahan sa JRG Halad Foundation mahimong motawag kang Cath sa JRG Halad Museum sa  Tel. Nos. 268-2579 o Joy sa 416-8090.

Nagduwa’g armas nakaigo og 15 anyos

Pusil nga giduwaan aksidenteng mibuto ug nakaigo sa usa ka 15-anyos nga batang babaye sa barangay Tubod, San Fernando sa miaging hapon.

Gipangita karon ang suspek nga si Frederico Generalao kinsa giingong naangol usab sa iyang kamot tungod sa aksidente dihang kalit nibuto ang.38 nga revolver nga giduwaan niini.

Sumala pa ni Police Officer 2 Jose Claire Palagtiosa, imbestigador, nagduwa sa maong armas sa ilang sala si Generalao samtang ang biktima kinsa diha nagpuyo sa balay  sa suspek padung mogawas sa lawak dihang naigo sa iyang paa.

Matud pa nga nakabantay siya nga naminhod ang iyang paa atol sa pagtikang niini sa pultahan nga nadungan sa buto sa armas.

Apan imbes nga tabangan ang bata, matud pa nasuko na hinuon ang suspek kay nganong adto midapig sa bata iyang mga paryente.

Ang ginikanan sa bata interesado nga mopasaka og kaso batok sa suspek. - /EIM) (BANAT NEWS)