CEBU, Philippines – Magkaatbang gyud sila si Kongresista Gabriel Luis Quisumbing ug Konsehal Emmarie “Lolypop” Ouano-Dizon sa pagka-mayor sa dakbayan sa Mandaue.
Gikatakda nga mosang-at sa ila’ng certificates of candidacy ang grupo ni Quisumbing ubos sa Liberal Party karong buntag kuyog ni kanhi bise mayor Carlo Pontico Fortuna isip iya’ng runningmate.
Nihural kagahapon kang Gobernador Hilario Davide III ang mga bag-ong sakop sa LP nga linya ni Quisumbing sama nila’ng Fortuna, Raul Cabahug, Nilo Seno, Leo Jabas, Marvin Soco, Cynthia Cinco Remedio ug Carmelino del Mar Jr. kinsa managan sa pagka-konsehal.
Kuyog kanila si Mayor Jonas Cortes kinsa modagan sa pagka-kongresista, Bise Mayor Glenn Bercede ug Konsehal Julius Alegado sa Consolacion nga mopapili sa pagkasakop sa hunta probinsiyal sa ika-unom nga distrito.
Gikan sa dakbayan sa Mandaue, ang grupo molahos sa Kapitolyo aron pagsang-at sa COC nila’ng Cortes, Bercede ug Alegado.
Si Davide namahayag nga lig-on ang LP sa ika-unom nga distrito bisan pa sa pagbiya sa mga Ouano kinsa nitapon sa One Cebu Party.
Ugma’ng adlawa, ang grupo ni Ouano-Dizon ug iya’ng runningmate nga si Konsehal Bethoven Andaya ang mosang-at usab sa ila’ng COC.
Sayo niini gikataho nga ang LP niduso kang Quisumbing sa pagpasubli sa pagka-kongresista ug hayan ikaatbang ang iya’ng kaalyado nga si Cortes kinsa mapupos na sa termino isip mayor samtang si Ouano-Dizon ang mag-mayor sa dakbayan.
Apan matud ni Ouano-Dizon nga dugay kaayo nga nakadesisyon ang LP hinungdan nga ila’ng gidawat ang imbitasyon ni kanhi bokal Winston Garcia kinsa kandidato sa One Cebu Party sa pagka-gobernador. - Romeo T. Limpangog ug Gregg M. Rubio) (BANAT NEWS)