CEBU, Philippines – Kanhi mayor ug mga opisyal sa lungsod sa Badian, Cebu ang gipasakaan og kaso diha sa Office of the Ombudsman-Visayas tungod sa pasangil nga nanikas sa pagpamalit og balor P150 mil nga tambal alang sa munisipyo.
Ang gikasohan mao sila si kanhi Badian mayor Carmencita Lumain; kanhi bise mayor Romeo Librando; municipal treasurer Susan Pique; ug wa pangalaning mga konsehal.
Usa ka Romeo Ejercito, nga nagpailang residente sa lungsod maoy nipasaka sa kaso ug miawhag sa Ombudsman nga mohimo og imbestigasyon sa gialegar nga anomalosong pagpalit og mga tambal nga mokabat og P189, 980 gikan sa usa ka pharmaceutical supplier, Cebu Pharma, niadtong Oktubre 7, 2003.
Ang maong mga tambal matud pa naglakip sa Amoxicillin, Mefenamic B Complex, Multivitamins B Complex, Paracetamol, Carbocistein Iron, Multivitamins Iron, Cotrimoxazole, Nepidine, Vitamin B Complex, Paracetamol Drops, Phenylpropanolamine, ug Salbutamol plus Guaifenesin.
Si Ejercito mipasangil sa iyang complaint-affidavit nga adunay laing supplier og tambal sa Cebu City nga makasuplay niining mga tambal apan mas barato og presyo nga mokabat lang og P37,761 wa pay labot sa singko porsiyento diskwento sa gobiyerno.
Sumala pa sa iyang reklamo, naalkanse ang munisipyo og P152, 219 sa pagpalit sa maong mga tambal.
“As a consequence of this gargantuan overpricing of drugs intended for the People of Badian, Cebu, the respondents have defrauded the municipal government to the tune of 152,219 Pesos to its disadvantage and prejudice for which the above respondents should be held criminally and administratively liable,” sumala pa sa dokumentong iyang giduso didto sa Ombudsan.
Ang reklamante mipasupot sa iyang reklamo og kopya sa official receipt nga gipirmahan ni Pique ngadto sa Cebu Pharma ug ang price list gikan sa laing supplier nga Jayze Pharma Corporation. (Gikan sa The Freeman/EIM)