CEBU, Philippines - Traffic enforcer sa dakbayan sa Talisay gidunggab sa drayber sa traysikol nga iyang gisita tungod sa paglapas sa lagda sa trapiko diha sa barangay Tabunok niadtong Huwebes sa hapon.
Nailhan ang biktima nga si Jimmy Cañizares, sakop sa City of Talisay-Traffic Operations Division Authority (CT-TODA) taga Poblacion.
Samtang nadakpan ang suspek nga si Jason Cabriana, 27, taga barangay Bulacao.
Base sa report sa kapulisan nga si Cabriana ang gisita sa kauban ni Cañizares tungod kay nihunong kini sa “no stopping” ug “no unloading area.”
Apan gikatahong nasuko si Cabriana mao nga miduol ang traffic enforcer kang Cañizares ug gipangayo ang lisensya sa suspek.
Sumala pa nga nisangpot na hinuon kini sa mainitong panaglalis ug nisuway pag-ikyas hinungdan nga gikuha ni Cañizares ang yawe sa tricycle ni Cabriana.
Wa magdahom si Cañizares sa gibuhat ni Cabriana nga diretsong miibot og icepick ug gidunggab siya niini sa makadaghang higayon.
Swerte nga nasagang tanan ni Cañizares ang icepick ug wa kini maigo sa lawas apan daghang samad siyang naangkon sa iyang mga kamot ug bukton ug dali sab nga nakatabang ang iyang kauban ug mga barangay tanod.
Si Cabriana niingon nga nawagtang siya sa iyang hunahuna tungod sa iyang kalagot nga gikuha ang yawe sa iyang motor ug nangayo kini og pasaylo.
"Pasayloa lang gyud ko kay gagmay pa intawon akong mga anak," matud pa ni Cabriana.
Mao kini ang ikaduhang higayon nga adunay misuway pagkutlo sa kinabuhi ni Cañizares samtang nagtuman sa iyang trabaho.
Niadtong miaging tuig gigukod siya og sundang sa trisikad drayber nga iya sab nga gisita.
Samtang si Supt. Germano Mallari, hepe sa kapulisan sa maong siyudad nagkanayon nga angay gyud nga mag-inampingon ang mga enforcers sa ilang trabaho tungod kay aduna gyuy masuko nga dakpon. Gipasakaan og kasong frustrated murder si Cabriana. (BANAT NEWS)