CHO sa Lapu-Lapu nidepensa sa report
CEBU, Philippines - Nidepensa si Lapu-Lapu City Health Officer, Dr. Rodolfo Berame, nga ang mga hospital sa dakbayan ang automatic nga moduso og dengue case report sa Regional Epidemiology Surveillance Unit-7 ug dili ang iya’ng opisina.
Matud ni Berame nga kung moduso pa siya, madoble na.
Sa niagi’ng adlaw, si Renan Cimafranca, pangulo sa RESU-7, gikataho’ng nireklamo sa dili pagduso og report ni Berame sa ila’ng buhatan.
Base sa record sa RESU-7 gikan sa Enero 1 hangtud sa Oktubre 3 niini’ng tuiga, ang dakbayan anaa sa ikaduha’ng pwesto nga adunay 257 ka kaso sa dengue ug usa ang gikataho’ng namatay.
Sa tuig 2014, ang dakbayan anaa sa ikatulo’ng pwesto nga adunay 227 ka kaso sa dengue apan wala’y narekord nga aduna’y namatay.
Dugang ni Berame nga ang City Epidemiology Surveillance Unit (CESU) ang mohimo og lahi nga pag-monitor apan dili nila apilon ang mga pasyente’ng adunay hilanat kay sagad niini wala’y dengue.
Ang RESU matud ni Berame apilon sa ila’ng rekord ang nakuha’ng hilanat.
Sa laing bahin si Mayor Paz Radaza nadismaya human naipit sa miscommunication sa duha ka ospital.
Nagkanayon ang mayor nga iya na’ng gimanduan si Berame nga mohatag kaniya og monthly report sa Mayor's Office ug makig-alayon sa mga opisyal sa barangay batok sa dengue. (BANAT NEWS)
- Latest
