CEBU, Philippines - Hayan mag-atbang sila si Kongresista Gabriel Luis “Luigi” Quisumbing ug Mandaue City Mayor Jonas Cortes sa pagka-kongresista sa ikaunom nga distrito sunod eleksiyon.
Kini human ang Liberal Party giingong mas interesado nga si Quisumbing magpabilin sa Kongreso kaysa modagan sa pagka-mayor sa dakbayan sa Mandaue.
Ang tinubdan nga nihangyo’ng dili magpaila nibutyag nga si LP vice chairman, Senate President Franklin Drilon, ang nisulti kaniya nga nindot nga komitiba sa Kongreso ang nagpaabot ni Quisumbing isip senior congressman.
Si Quisumbing mao karon ang vice chairman sa gamhanan nga House Committee on Finance.
Si Drilon giingong nipahibawo usab nga si Konsehal Emmarie “Lollipop” Ouano-Dizon ang kandidato sa LP sa pagka-mayor sa dakbayan.
Apan si Quisumbing niingon nga ila pa’ng han-ayon ang grupo sa ikaunom nga distrito nga gidasonan usab sa LP provincial chairman nga si Gobernador Hilario Davide III.
Matud ni Davide nga may kasabutan sila si Quisumbing ug Cortes nga magpuli sila og posisyon nga daganan sa 2016.
Si Quisumbing aduna pa’y usa ka termino sa Kongreso samtang dili na makapasubli si Cortes sa pagka-mayor.
Ang taho nitumaw human niluwat og pamahayag si Cortes nga andam siya mag-independente sa higayun nga dili siya ang pilion sa LP nga kandidato sa pagka-kongresista. (BANAT NEWS)