Daghang tulis sa Talisay gikaalarma

CEBU, Philippines - Gihulagway sa kapolisan nga alarming na ang 25 ka tulis nga natala sa dakbayan sa Talisay sulod sa buwan sa Septiyembre.

Sa natala, 16 niini ang lungkab diin ang uban aduna’y nailhan nga suspek nga napasakaan og kaso apan ang uban pabiling wala ilhi samtang ang siyam pulos tulis mugna sa riding-in-tandem nga armado og kutsilyo ug armas.

Matud ni Supt. Germano Mallari, hepe sa kapolisan sa siyudad sa Talisay, nga gipalihok na nila ang mga kontak aron pagkuha sa mga kriminals.

Nagtuo si Mallari nga mamenusan na ang krimen human ila’ng napatay ang notado’ng lider sa kriminal nga mao sab ang ikapito’ng most wanted nga si Richie Daan apan sayop gumikan kay posible nga ang igsuon nga usa sab ka wanted ang nipuli.

Laing gisubay ang grupo sa manulisay nga nagbase sa barangay Linao.

Si Kapitan Teodoro Belleza sa Poblacion nihulagway sa mga kriminal nga mangtas tungod sa ila’ng binuhatan nga wala’y kukahadlok bisan duol ra sa police station ug ang mga tanod ra sab ang bantayan.

Si Insp. Windell Abellana, deputy chief sa kapolisan, nitug-an nga kinahanglan gyud sila sa tabang sa komunidad aron mailhan ug madakpan ang mga sagbot sa katilingban.

Tambag sa kapolisan sa katawhan nga dili mokompiyansa kay ang trabaho sa mga kiriwan og kamot ug mga tulisan mao ang pagsagol sa kadaghanan ug diha mohimu sa ilang dautang lakang.

Samtang atol sa sesyon sa konseho, niduso og resolusyon si Konsehal Edward Alesna sa pagpahalipay sa kapolisan sa mga nasakmit nga video karera machines.

Apan si Konsehal Dennis Basillote nibabag sa rason nga normal kini nga trabaho sa polis ug wala’y talagsaon sa ila’ng nahimo.

"Ngano’ng ato man na sila’ng pasidunggan nga trabaho man na nila. Wala man gani sila nakasumpo sa sugal ug drugas sa Dumlog nga nagkagrabe na," matud ni Basillote kinsa kanhi kapitan sa Dumlog.

Si Mallari nagkanayon nga trabaho gyud na nila ang pagsikop sa tanang matang sa ilegal ug ang pasidungog segunda na lang.

Matud niya nga wala siya’y problema kun sila pasidunggan ba o dili basta nihimo lang sila sa ila’ng trabaho.

Usa sa problema ni Mallari ang kakuwang sa iya’ng mga sakop nga 80 lang ka polis.

Giawhag hinuon ni Mallari si Basillote nga mohatag og impormasyon kun kinsa’ng mga tawhana ang naglihok sa ilegal diha sa iya’ng barangay.

Iya gisanglitanan sila si kapitan Vic Bas sa Mohon ug Raul Cabañero sa Bulacao nga nitawag lang niya ug iya dayung gihimoan og lakang ang ila’ng sumbong.

Ang resolusyon naaprobahan human ang siyam ka konsehal ang nipabor sa resulosyon samtang si Basillote ug Konsehal Val Ylanan lang ang nisupak. (BANAT NEWS)