7th District maapil na sa mopili og kandidato

CEBU, Philippines - Aprubado na sa Comelec en banc ang gipadangat nga suwat ni 2nd District Congressman Wilfredo Caminero nga amendahan ang naunang Resolution 9981 nga han-ay sa gimbuhaton atol sa eleksyon. Apil sa giapas ang schedule sa filing sa Certificate of Candidacy (COC). Ang Comelec nipasidaan nga di unya maapil sa eleksyon sunod tuig ang 7th  Provincial District kung di maamendahan ang naunang resolution.

Si Bartolome Sinocruz, Jr. ang Deputy Executive Director for Operations sa Comelec nipahibawo nga giaprubahan na sa Comelec en banc nga maapil na sa May 9, 2016 National and Local Elections ang posisyon pagka-kongresista ug duha ka Provincial Board Members sa 7th District.

Ang 7th District naumol pinasikad sa balaod ang RA 10684  niadtong Septiyembre 18, 2015 diin gibuak ang 2nd District tungod sa ka dako sa area niini nga gilangkoban sa 15 ka mga lungsod.

Kini maoy nakitang hinungdan nganong wala kaayo matagad ang mga basic services gikan sa provincial government ug sa kaulohan sa maong distrito.

Gipahibaw ni Sinocruz nga mosunod ra dayon ang resolusyon nga pag-amendar na sa Resolution 9981.

Si Caminero nagtuo nga mahatagan na unya og pagtagad ug matutukan ang mga lungsod ug barangay sa maong gibuak nga distrito. Ang 7th District langkoban sa Ginatillan, Malabuyoc, Alegria, Badian, Moalboal, Alcantara, Ronda, ug Dumanjug.

Samtang nahibilin sa 2nd District mao ang Argao, Dalaguete, Alcoy, Boljoon, Oslob, Santander, ug Samboan. (BANAT NEWS)