City hall employees nagprotesta

CEBU, Philippines - Bisan nagbunok ang uwan, lima ka oras nga nagprotesta atubangan sa Cebu City Hall ang mga kawani niini ug barangay aron ipanawagan ang pagpasar sa P2.8 Bilyones nga Supplemental Budget No. 1 diha sa konseho.

Apan napunta lang sa wala ang ilang protesta human gibarugan sa konseho nga gidominar sa oposisyon ang panawagan kay wala kini gituki sa sesyon kagahapon tungod kay buot nila nga maresolbar una ang gipasakang kaso sa usa ka Romulo Torres nga nanawagang dili ipagamit sa siyudad ang halin sa South Road Properties (SRP).

Anaa sa SB No.1 ang budget alang sa Productivity Enhancement Incentives (PEI) sa mga kawani; tipping fee sa basura ug ibayad sa utang sa siyudad didto sa Japan International Cooperation Agency (JICA) sa pagtukod sa SRP.

Ang siyudad niadto pang bulan sa Abril nahurot ang pundo sa tipping fee nga pangbayad sa siyudad sa mga basurang ilabay sa pribadong landfill didto sa Consolacion.

Si Konsehal Gerardo Carillo miawhag sa konseho nga klaruhon na lang kun ilang aprubahan o dili ang maong budget tungod lang sa rason nga adunay kaso nga gipasaka ni Torres.

Si Carillo daan nang namahayag nga di buhis ang halin sa SRP nga maoy gustong palutawon ni Torres sa iyang reklamo.

Apan si Konsehal Sesinio Andales sa iyang bahin nipasabot nga ang pagsuspende sa pagtuki sa supplemental budget paagi nila aron protektahan ang kwarta sa katawhan. “We’re just protecting the money of the people,” matud ni Andales. Si City Attorney Jerome Castillo mipasabot nga adunay katungod ang mga kawani magprotesta tungod kay ang Pilipinas usa ka demokratikanhong nasud.

“What is the point of delaying everything, we have suffered so much (City of Cebu) ?”matud  pa ni Castillo.

Ang Civil Service Commission (CSC)-7 mohimo og imbestigasyon kalabot sa maong protesta kun wa ba sila nakalapas sa balaod ilabi na nga tingtrabaho niadtong mga orasa ug nangabalda ang transaksyon ug serbisyo publiko tungod sa nahitabo.

Matud sa Chief Personnel Specialist on Public Assistance and Liaison Division sa CSS-7 Prolaine Daclan, ilang tan-awon on kun ang tanang empleyado miapil sa lihok-protesta ug naputol hinuon ang ilang trabaho.

Samtang ang legal officer sa DILG-7 Atty. Aiza Fiel Nogra, wa makakita og dautan sa gibuhat sa konseho tungod kay kabahin kini sa ilang gahom kun ipasar o dili ang giyangungo sa mga tawo.

Si Mayor Michael Rama sa iyang bahin nagpasalamat sa tanang mga tawo nga matud niya nibarog alang sa kaayohan ug kaangayan sa tanan.

Gihagit ni Rama ang nikiha sa mga konsehal nga ilakip siya pagkiha. (BANAT NEWS)