Relo, i-Pad ni Montebon na-recover

CEBU, Philippines - Igsuon sa prime suspect sa pagpanulis ug pagpatay sa tinun-ang si Karen Kaye Montebon apilon sa pasakaan og kaso sa Criminal Investigation and Detection Group 7.

Kini human na-recover sa CIDG-7 ang i-pad ug relo de pulso nga iya sa biktima ug sa amahan niini gikan sa lalaking nagpaila lang sa pangalang “Alan” nga taga Inabanga, Bohol kagahapon.

Sumala pa ni Superintendent Fermin Armendarez, deputy regional officer sa CIDG-7 kagahapon, si Alan miduol kanila ug mipahibalo kabahin sa pagdawat niya og i-pad ug relo nga giprenda ni Ibyang Fernandez apan nagduda si Alan nga  iya kini sa biktimang si Montebon.

Tuod man, ang amahan ni Kaye nga si James miadto kagahapon sa buhatan sa CIDG-7 ug positibong miila sa maong relo ug i-pad sa anak.

Matud pa niya, ang i-pad mao pa ang orihinal nga case sa pagpalit nila niini samtang ang relo iyaha kadto. Ang maong mga butang lakip sa gidala sa suspek nga si Ruben Fernandez dihang gipatay si Karen. Si Ruben  gipatay usab didto sa isla sa Nasingin sa lungsod sa Getafe, Bohol duha ka adlaw human nalubong si Montebon.

Matud pa ni Armendarez pasakaan nila og kaso ang igsuon ni Ruben nga maoy gituohang giadto ni Ruben sa Getafe. Kasong accessory to the crime ug obstruction of justice ang ilang planong isang-at batok kang Ibyang kinsa atoa pa gihapon sa Getafe. (Edwin Ian Melecio gikan sa The Freeman)