CEBU, Philippines – Lima ka kawani sa munisipyo sa lungsod sa Sta. Fe ang nagpositibo sa gipahigayung drug test kagahapon sa buntag human sa flag raising.
Lakip ang mayor, bise mayor ug mga konsehal sa lungsod ang gipaubos sa drug test kauban sa 300 ka mga kawani apan adunay lima ka job order ang giingong nisibat.
Ang hepe sa Cebu Provincial Anti-Drug Abuse Commission, Joey Hererra, nibutyag nga upat ka kawani ang positibo sa paggamit og shabu ug laing usa ang positibo sa paggamit og marijuana nga gilangkuban sa JO ug regular nga kawani.
Usa ka JO ang giingong niangkon nga tiggamitan siya og ginadili’ng drugas ug ni-resign dayun sa iya’ng trabaho kagahapon.
Matud ni Hererra nga ang kagamhanan sa lungsod ang nihangyo sa drug test ug ang CPADAC nihatag og 40 ka drug testing kits alang sa 40 ka tawo.
Si Mayor Jose Esgana nagkanayon nga ipaubos pa sa confirmatory test ang resulta ug kung makompirmar na ang resulta, ang mga JO nga nagpositibo palagputon sa trabaho samtang ang mga regular ipaubos pa sa proseso subay sa balaud.
Ang lima ka JO nga giingong nisibat ipaubos kini sa imbestigasyon.
Dugang ni Esgana nga ang mao’ng drug test usa sa ila’ng mga lakang sa kampaniya batok sa ginadiling drugas. – /GMR) (BANAT NEWS)