Team Rama kompleto na
CEBU, Philippines – Nakompleto na ang kandidato ubos sa partido ni Mayor Michael Rama alang sa umaabot nga 2016 eleksyon.
Sa press conference kagahapon sa iyang panimalay sa barangay San Nicolas, mipagawas na siya sa kompleto nga lista sa distrito sa norte nga gilangkuban nilang barangay Apas nga Kapitan Ramil Ayuman, barangay Tinago Kapitan Joel Garganera, Pastor “Jong” Alcover, Edwin Jagmoc, ug Edgardo “JP” Labella, Jr.
Una nang gipresentar ni Rama ubos sa North District silang Konsehal Noel Wenceslao, barangay Kamputhaw Councilman Raymond Garcia, ug kanhi kapitan Jerry Guardo.
Sa South District, una nang gipagawas ni Rama ang iyang kandidato nga silang konsehal David Tumulak, Hanz Nendell Abella, ug James Cuenco, kanhi city councilors Jose Daluz III, Jocelyn Pesquera, Eduardo Rama, Renato “JunJun” Osmeña Jr., ug si Inayawan Barangay Captain Lutherlee “Lot-Lot” Ignacio-Soon.
Silang Alvin Garcia ug si Konsehal Gerardo Carillo ang modagan alang sa north ug south district congressional seat. Si Bise Mayor Edgardo Labella gihapon ang modagan isip bise mayor sa maong partido.
Ang “Team Rama” adunay bag-ong pangalan nga mao ang Partido Panaghiusa sa Panerbisyo-Tungod Sa Gugma-Team Rama-United Nationalist Alliance kon PPP-TSG-TR-UNA.
Nagpasalamat si Rama sa mga tawo nga wala maapil sa lista apan misuporta gihapon sa iyang partido. Dugang niya nga dugay nakadisider ang grupo sa kompleto nga lista sa maong line-up.
Sigon ni Rama nga ang iyang line-up kondisyon na nga makadaog sa piniliay sunod tuig.
Adunay pormal nga pagpresentar sa kompletong line-up ang Team Rama karong semanaha usa pa maabot ang Biyernes nga mao ang regional launching sa United Nationalist Alliance. – /EIM) (BANAT NEWS)
- Latest
