CEBU, Philippines – Kun ang mga residente sa barangay Langub, Asturias ang pahukmon mas maayong sirad-an ang poultry farms sa ilang barangay aron mawagtang na ang problema nila sa mga langaw nga nakamugna og grabeng purhesyo kanila.
Si Prosper Awit, 57, nga nahinabi sa Banat News miingon nga ang poultry farm gyud ang hinungdan sa pagdagsa sa langaw. Matud pa niya nga sa unang wala pay poultry farm wala man sila makasugat og problema sa langaw apan dihang natukod diha na nidagsa ang langaw.
Sumala pa niya, mas modaghan ang langaw matag higayon nga mag-harvest ang poultry farm matag 29 ka adlaw.
Dugang niya nga sa higayon nga mag-harvest isakay ang mga manok ug ibiyahe kini apan sa matag biyahi niini agi sa karsada mouban sad ang langaw.
Matud pa niya nga grabi ang problemang dala sa langaw gikan buntag hangtod sa gabii.
Samtang si Amalik Gutierrez, miingon nga bisan sa duyan sa iyang gamay nga bata motugdon ang langaw ug ila na lang paspasan ni aron di motugdon sa bata.
Laing nagreklamo nga mao si Julita Lacaba, nagpuyo dul-an kilometro gikan sa poultry farm miingon nga sa kasamokan sa mga langaw iya na lang giguba ang iyang muskitero ug iya ning giputos sa iyang kiosko aron di mosulod ang langaw.
Matud pa niya nga sa una nga wala pa ang poultry farm bisan sa iyang ad sa baboy pwede pa siyang mokaon pero karon dumogon na sa langaw ang iyan kan-onon.
"Kung magtanga-tanga ka, aw ilogan ka sa langaw," dugang ni Lacaba.
Tungod niini nakahukom silang moreklamo diretso sa Kapitolyo aron masulbad dayon ang ilang problema.
Nagpahigayon sila og signature campaign ug gidala ni ngadto sa Kapitolyo sa igsuon ni Prosper nga si Eliakim, kanhi hepe sa polis sa maong lungsod.
Niadtong miaging Biyernes miabot sa Langub ang mga taga Kapitolyo, matud pa ni Awit ug ilang nakita ang kadaghan sa mga langaw.
May gihatag nga medisina nga ibutang aron mamatay ang langaw apan pipila ka adlaw human niadto mibalik na sad ang langaw.
Matud pa ni Lacaba ug ni Prosper Awit nga di na gyud ma-agwanta ang kadaghan sa langaw ug usa ra gyu’y sulbad niini ang pagpasira sa poultry farm. – /EIM) (BANAT NEWS)