Kalungsoran tukoran og solar power plants
CEBU, Philippines – Usa ka langyaw nga kompaniya nagplano nga motukod og Solar Power Plants sa tanang kalungsuran sa Sugbo aron makaabag pagsulbad sa problema sa kakuwang og kuryente sa umaabot nga katuigan.
Matud ni Bokal Grecilda Sanchez nga ang YEC International maoy moinstalar og mga Solar Power Plants ug ang kuryente nga ilang matigum ipasa nila ngadto sa mga power distributors pinaagi sa mga linya sa National Grid Corporation of the Philippines (NGCP).
Si Sanchez miingon nga wala’y gasto ang probinsya sa Sugbo sa pagmugna og mga solar power plants sa kompaniya nga nagbase sa Singapore.
Kini maoy pagpangandam tungod sa report sa Department of Energy (DOE) nga makasinati ang Sugbo og pagnihit sa kuryente sa tunga-tunga sa tuig sa 2016 ug 2017 tungod sa padayong paglambo.
Matud ni Sanchez nga mentras wala pa mamugna ang Trans-Axial Highway kon karsada nga anha mag-agi sa bukiran sa Sugbo, kinahanglang may suplay na sa kuryente ang maong dapit.
Ang YEC International nakapatukod na og mga solar power plants sa Luzon ug gusto nila nga magmugna usab sila dinhi sa Sugbo.
Target sa mao nga kompaniya nga motukod sila og 10 Megawatt solar power plant sa matag lungsod kon 500 megawatt sa tibuok probinsiya.
Ang YEC International adto mosumiter kang Bise Gobernador Agnes Magpale kabahin sa ilang tinguha pagtukod og mga solar power plants sa Sugbo. – /RUB) (BANAT NEWS)
- Latest
