CEBU, Philippines – Si Naga City Mayor Valdemar Chiong mihulagway ni Kongresista Gerald Anthony “Samsam” Gullas nga kugihan nga pagka magbabalaod.
Matud ni Mayor Chiong nga nalipay g’yud siya sa gipakitang lihok ni Kongresista Gullas nga gawas sa iyang pagka magbabalaod, aktibo pa gayud kini pagsuroy sa mga dapit nga naglangkob sa unang distrito.
Ang una’ng distrito sa Sugbo gilangkoban kini sa dakbayan sa Talisay, lungsod sa Minglanilla, San Fernando ug Sibonga, ingon man ang mga dakbayan sa Carcar ug Naga.
Si Chiong miingon nga gawas sa trabaho ni Gullas isip magbabalaod, “hands on” pud kini sa pagsuroy sa kabarangayan aron pagsusi kun unsa ang angay niya nga himuon.
"Lipay kaayo mi nga ang among congressman kugihan. Bisan unsa kagamay sa barangay iya g’yud ni nga adtuon. Hasta gani sa mga consultation kabahin sa mga proyekto, visible ‘sab kaayo siya," matud ni Chiong.
Ang batan-ong Gullas nga apo ni gobernador Eduardo Gullas magpapili pagbalik pagka kongresista sa una nga distrito. Gihugon-hugon nga ang batan-ong Gullas atbangan ni Mayor Antonio Canoy sa lungsod sa San Fernando.
Gani si Canoy makit-an na nga nagsuroy-suroy na sa kabarangayan sa una’ng distrito aron pagpahibalo sa iyang tinguha nga atbangan si Kongresista Gullas.
Matud ni Chiong nga katungod sa tanang tawo ang pagdagan sa mga puwesto sa kagamhanan atol sa eleksyon apan iyang natimbang-timbang nga mas haum si Gullas nga mopadayon sa nasugdan niya nga katungdanan. – /RUB) (BANAT NEWS)