CEBU, Philippines - Si Bise Gobernador Agnes Magpale nga kaalyado sa Bakud Party mihimakak sa taho nga posibleng mobiya sila sa Liberal Party (LP).
Giklaro kini ni Magpale nga sa lokal sila gihapon ang magpares ni Gob. Hilario Davide III sa umaabot eleksiyon sa sunod tuig.
Ang Bakud usa kini ka lokal nga partido ug kaalyado kini sa National People’s Coalition (NPC) nga usa ka national nga partido.
Ang NPC kinsa ang chairman niini sa ikalimang distrito si Kongresista Ace Durano kaalyado sa LP hinungdan nga ang Bakud nahimo usab nga alyado sa LP nganhi sa lokal.
Ang standard bearer sa LP mao si Mar Roxas apan ang NPC giingong posibleng adto mosuporta sa kaatbang nga si Senador Grace Poe. Niining ulahi lang si Poe nakigkita sa mga sakop sa Bakud sa ikalimang distrito pinangulohan ni Bise Mayor Ramon “Red” Durano VI.
Si Magpale nagkanayon nga ang ilang pakig-alyansa sa LP nganhi sa lokal wala kini maapektohi. Giklaro usab ni Magpale nga wa siya didto sa maong tigom ug wa siya masayod kun unsay ilang nasabotan. (Brenda D. Batuto/EIM)(BANAT NEWS)