Namatay sa dengue napun-an

CEBU, Philippines - Human niadtong magsuon nga namatay tungod sa dengue diha sa barangay Pasil, Cebu City laing bata na usab ang nakalas gumikan gihapon sa maong sakit sa mao gihapong siyudad.

Ang uwahing namatay mao ang 5 anyos nga batang babaye nga taga barangay Apas dakbayan sa Sugbo.

Nasuta ang maong 5 anyos nga bata nagsaulog pa sa iyang adlaw’ng natawhan niadtong Septiyembbre 16 apan niadtong petsa 29 giingong gisakitan sa tiyan ang bata.

Matud pa gihimasmohan kini sa iyang inahan ug gidala sa usa ka pribadong tambalanan.

Apan pasado alas 6 sa gabii niadtong Septiyembre 30 adlaw’ng Miyerkules nabugtuan sa iyang kinabuhi ang maong bata ug matud pa ang gidudahang hinungdan sa iyang kamatayon mao ang dengue.

Matud ni Dr. Daisy Villa, Cebu City Health Officer, base sa talaan sa ahensiya mao na kini ang ika-868 ka kaso sa dengue ug ika-12 nga nakalas dinhi sa  siyudad sa Sugbo karong tuiga.

Sa bulan lang sa Septiyembre  unom na ka bata ang namatay sumala pa ni Villa.

Si Apas Barangay Captain Ramil Ayuman nagkanayon nga adunay himuong misting ug larvicide operation karong adlaw nga Domingo sa iyang barangay dungan sa  himuong lapad nga susamang operasyon sa City Health Department sa dakbayan.

Ang City Health Department naalarma na gumikan sa sagunson nga kaso sa dengue sa siyudad sa Sugbo diin sagad sa mga biktima niini mga bata.

Gani, awhag nila sa publiko nga maglimpyo gyud sa palibot, dili magpundo og tubig nga maoy itlogan sa mga lamok ug kun mahimo magsul-ob og sinina nga makaproktektar sa kaugalingon aron dili dayon mapaakan sa lamok.

Ang napulo ka barangay nga nag-una sa dunay daghang kaso sa dengue mao ang Guadalupe diin adunay 99 nga kaso; Lahug, 52; Basak San Nicolas 48; Talamban 32; Mabolo 34; Labangon 30; Mambaling 29; Camputhaw ug Apas 28; Inayawan 25; ug Duljo-Fatima 24. (Decemay P. Padilla ug Sheriza Mae Uy/EIM)(BANAT NEWS)