CEBU, Philippines - Giusban na usab og lungkab ang Vicente Sotto Memorial Medical Center (VSMMC) sa wala mailhing kawatan niadtong nakalabay nga semana. Kini ang gitug-an sa hepe sa Theft and Robbery Section (TRS) sa Cebu City Police Office, Chief Inspector David Señor.
Matud pa ni Señor nga niadtong Septiyembre 21, usa ka Leoncio Eramis, admin aide sa maong tambalanan ang nakadiskobre nga gilungkab ang ilang training center pinaagi sa pagguba sa pultahan niini. Giguba sa kawatan ang cabinet file vault ug gilimas ang mga mahalong gamit sama sa McBook P50,000; laptop P126,000; Nikon DSLR P85,000; ug cash nga P3,000 nga iya sa usa sa mga doktor sa maong tambalanan.
Ang mga sakop sa Fuente Police, TRS ug Crime Scene Investigation Unit (CSI) naghimo na karon og imbestigasyon sa maong hitabo. Sumala pa ni Señor nga nakasulod ang kawatan agi sa sliding window sa pikas lawak ug adunay narekober nga usa ka paresan sa sapatos nga iya sa usa ka doktor nga gisuwayan pagkuha apan wala nadala. Adunay nakuhang mga fingerprints sa crime scene ug gisusi na kung takdo kini sa nakuha nilang fingerprint sa pagpanglungkab gihapon niadtong bulan sa Hulyo diha gihapon sa VSMMC.
“Atong gi-recommend magtaod og cctv camera kay maghisgot ‘ta og security (mga gwardiya) estrikto man kaayo. Wa may feedback ambot kaha karon,” matud pa ni Señor. (Jojo C. Ugdol/EIM)(BANAT NEWS)