CEBU, Philippines - Nakigtagbo sila si Senador Grace Poe ug Francis “Chiz” Escudero sa mga sakop sa Barug Alang sa Kauswagan ug Demokrasya (Bakud) Party sa ikalima’ng distrito sa probinsiya sa Sugbo kagahapon.
Personal nga giabi-abi si Poe ug Escudero sa kadagkuan sa Bakud Party nga gipangulohan Danao City Mayor Ramonito “Nito” Durano III kauban sa mga mayor sa distrito gawas sa lungsod sa Liloan nga dili nila kaalyado.
Matud ni Durano nga wala pa sila’y commitment kung kinsa ang ila’ng suportahan ug welcome nila ang tanan kandidato nga moduaw sa ila’ng partido.
Si Kongresista Joseph Felix Mari “Ace” Durano niklaro nga usa lang ka luncheon invitation ang ila’ng panagtagbo ug pagkukabildo isip managhigala ug wala’y bulok politika.
Iya’ng gipahibawo nga sabutan pa sa partido kung kinsa ang suportahan subay sa prinsipyo sa Bakud Party.
Ang Bakud Party kaalyado sa Liberal Party (LP) sa 2013 nga eleksiyon ug nangharos sa nidaug sa distrito ug sa tibuok probinsiya sa Sugbo. Sila si Poe ug Escudero nibisita sa Sugbo kagahapon aron pagtubag sa mga isyu nga giatubang sama sa citizenship.
Alang kang Poe ug Escudero, dili hulga kanila nga giila’ng balwarte sa LP ang Sugbo.
Daku ang pagtuo sa duha nga ang pagpili dili base sa partido kun dili ang mahatag nga kaayuhan ug kalambuan sa nasud.
Dinhi sa Sugbo, ang mga senador niingon nga usa sa pamaagi aron makuha nila ang suporta mao ang pagtuman sa unsa’y gisaad ug pagtubag sa mga problema nga dugay na nga giatubang sa nasudnong kagamhanan. Giklaro ni Poe ug Escudero nga independente sila’ng duha ug wala pa sila’y kaalyado sa Sugbo. (BANAT NEWS)