CEBU, Philippines - Nangandam ang Commission on Elections sa posible’ng pagpahigayun og mall registration atol sa katapusang adlaw sa pagpangrehistro sa mga botante karong Oktubre 31.
Si Provincial Election Supervisor, Atty. Lionel Marco Castillano, mibutyag nga gawas sa pagpangandam nila sa pagsang-at sa Certificates of Candidacy (COC) sa mokandidato, nangandam usab sila sa posible’ng mall registration.
Ang pagsang-at sa COC ipahigayun karong Oktubre 12 hangtud 16, 2015.
Si Comelec Chairman Andres Bautista nimando kanila nga i-priority ang mall registration sa mga lugar nga adunay malls.
Matud ni Castillano nga ang mall registration magsilbi na usab kini’ng dry-run alang sa mall voting o sa posible’ng pagpahigayun og botasyon sa mga malls kinsa si Bautista giingong seryoso kabahin sa mall voting.
Matud ni Castillano nga kadto’ng mga lugar nga wala’y mall apan adunay sports complex o covered court ug duol sa buhatan sa Comelec sa lugar ang posible’ng anha ipahigayun ang pagpangrehistro.
Niining ulahi lang ang Comelec sa probinsiya nihangyo sa Comelec sa Manila kabahin sa mall registration.
Si Castillano nagkanayon nga wala pa sila makadawat og tubag sa hangyo apan si Bautista giingong nipadayag kang Comelec-7 Director Rafael Olaño nga pabor siya kabahin sa pagpahigayun og mall registration.
Gibutyag ni Castillano nga ang mga Election Officers (EOs) aduna na’y mga nakit-ang mall nga available sa mga dakbayan sa Mandaue ug Lapu-Lapu, lungsod sa Consolacion samtang sa dakbayan sa Sugbo pilian ang SM ug Robinson ug mag-finalize pa sila niini.
Gilauman nga magdasok ang mga tawo nga magparehistro atol sa katapusang adlaw sa pagpangrehistro hinungdan nga giplanohan ang mall registration. (BANAT NEWS)