CEBU, Philippines – Dul-an sa 500 ka mga tawong nakalapas sa lagda sa Anti-Jaywalking Ordinance sa dakbayan sa Sugbo ang nasikop ug gipamulta sa mga tinugyanan sa Cebu City Transportation Office Anti-Jaywalking Task Force sulod lamang niining semanaha.
Matud pa ni Atty. Rey Gealon ang pangulo sa CCTO, gumikan sa paghingusog nila sa City Ordinance 1841 o Anti-Jaywalking Ordinance ug sa City Ordinance 1891 o ang pagpataka og pasakay ug pakanaog og pasahero gatusan ka mga malapason ang nasikop.
Sumala pa ni Gealon, adunay mga gitagana nga pedestrian lanes ug hunonganan nga lugar sa mga pasaheroan apan aduna gihapoy mga tawo nga malapason sa maong lagda.
Nasayran nga gawas sa pagpamulta niadtong mga malapason sa Anti-Jaywalking Ordinance, kadtong dili makabayad sa multang P50, kinahanglang magpaubos og traffic education seminar ug mopaubos sila sa community service o maglimpyo sa palibot. – /EIM) (BANAT NEWS)