CEBU, Philippines – Magpapili sa pagkakonsehal sa dakbayan sa Sugbo si kanhi kongresista Pastor “Jun” Alcover Jr. sa Alliance for Nationalism and Democracy (ANAD) Party-list.
Gipahibawo ni Camputhaw barangay konsehal, Atty. Raymond Alvin Garcia, nga si Alcover ug siya naapil sa listahan sa mga kandidato sa pagka-konsehal sa Cebu City North District ubos sa Team Rama.
Matud ni Alcover nga magpaabot siya sa opisyal nga pahibawo ni Mayor Michael Rama.
Ang iyang anak nga si Pastor “Jongjong” Alcover III maoy deputy mayor ni Rama sa mga bukirang barangay.
Si Jongjong nakakompleto sa iyang termino isip barangay kapitan sa Agsungot ug gipulihan sa iyang asawa nga si Noli Ann.
Laing anak ni Jun nga si Lemar Alcover maoy barangay kapitan sa Sambag 1, dakbayan sa Sugbo.
Si Alcover nahimong kongresista niadtong 2007 nga eleksiyon apan nakalingkod Abril 28, 2009 na gumikan sa protesta nga giatubang.
Sa 2010, nalangan usab ang paglingkod ni Alcover sa ikaduhang termino hangtud nga gi-disqualified sa Commission on Elections kauban sa laing 11 ka partylist groups sa 2013 elections. – /EIM) (BANAT NEWS)