CEBU, Philippines - Si Gobernador Hilario Davide, III mibiya kagahapon paingon ngadto sa St. Petersburg sa nasud sa Russia aron makigkita sa mga opisyal didto aron palig-onon ang maayong relasyon sa probinsya sa maong dapit.
Si Davide mibutyag nga niadtong tuig 2009 ang probinsiya ug Saint Petersburg duna kini friendship ug cooperation agreement ug ang pagpirmahay sa maong kasabutan napahigayon ngadto sa St. Petersburg.
Matud ni Davide nga pinaagi kang Honorary Consul Armi Garcia kinahanglang palig-unon ang maong kasabutan.
Gawas sa pagpakigkita sa gobernador sa Saint Petersburg nga si Georgy Poltavchenko makigkita usab si Davide kang Senador Valentina Matviyenko ngadto sa Moscow.
Si Matviyenko kinsa Senate President na karon sa Russia maoy gobernador kaniadto sa St. Petersburg dihang napirmahan ang nahisgutang kasabutan.
Matud ni Davide nga sa meeting unya nila ni Poltavchenko mogama sila og kasabutan kabahin sa joint committee aron masugdan ang mga naunang nasabutan.
Ang friendship ug cooperation agreement gilangkuban kini sa tourism, education exchange, uban pang program, kultura ug sports.
Matud usab ni Davide nga nasayran niya gikan sa embahada sa Russia nganhi sa nasud nga ang matuki sa ilang meeting ni Poltavchenko mao usab ang tukion sa Presidente sa Russia Vladimir Putin inig tambong niya sa Asia Pacific Economic Cooperation (APEC) meeting sa head of states sa buwan sa Nobiyembre niining tuiga didto sa Manila.
Dugang ni Davide nga posible nga lakip sa mahisgutan sa ilang meeting tali ni Poltavchenko mao ang pagbaton og direct flight gikan sa St. Petersburg paingon nganhi sa Sugbo. (BANAT NEWS)