CEBU, Philippines - Patay ang usa ka lola human nabanggaan og multicab samtang naglakaw sa karsada pasado alas-5 sa miaging buntag sa barangay Pungtod sa lungsod sa Oslob.
Ang namatay naila nga si Esterlita Ampoon, 60, taga Nueva, Caceres, Oslob samtang ang nag-drive sa multicab nga nakadasmag kaniya mao si Eusebio Gerobiese.
Base sa imbestigasyon sa kapolisan, ang biktima naglakaw sa karsada apan kalit lang siyang gidaro sa multicab.
Human maigo ang biktima nabangga pa gyud sa poste sa telepono ang multicab. Gidala pa unta sa Oslob District Hospital si Ampoon apan gideklarar na kini nga dead on arrival.
Sa laing bahin, duha ka tawo ang kritikal human nawad-an og brakes ang usa ka tanker truck nga pangsuyop sa hugaw sa tawo ug gidaro ang kabalayan diha sa sitio Tambis, barangay Poog dakbayan sa Toledo kagahapon sa hapon.
Ang naangol mao sila si Aldrin Bacus Bonghanoy taga Jaclupan Talisay City, drayber ug si Bobby Jumao-as, 41, truckboy kinsa kritikal ang kahimtang atol ning pagsuwat sa balita.
Matud pa sa kapolisan gikan sa Cebu City ang tanker paingon unta sa lungsod sa Balamban.
Apan sa pagdulhog niini sa barangay Poog nibasiyo ang brakes niini hinungdan nga nawad-an og kontrol ug nalahos sila sa kabalayan hinungdan sa pagkaguba sa balay sa usa ka naila lang sa pangalang Rosario ug giharos usab ang baboyan ug manokan nila ni Bernard ug Rowena Cuerda.
Nangamatay ang duha ka baboy ug unom ka manok. Matud sa nakasaksi nga kusog ang dagan sa maong tanker hinungdan nga nalahos kini diin susama sa nilupad paingon sa kabalayan ug hapit pa kini matagak sa sapa.
Gidala ang mga biktima sa Vicente Sotto Memorial Medical Center. (BANAT NEWS)