CEBU, Philippines - Tinguha ni Mayor Elanito Peña nga mahimo’ng siyudad ang lungsod sa Minglanilla sunod tuig.
Si Peña nagkanayon nga dugay na nila nga damgo nga matawag ang ila’ng lungsod nga usa ka dakbayan sa una’ng distrito apan wala gyud kini mahimo tungod sa daghang rason.
Usa na niini ang income sa lungsod ug gidak-on sa lugar samtang sa gidaghanon sa mga tawo lang sila mopasar.
Si Peña niingon nga kung matigayun na ang reclamation project karong tuiga hayan modaku na ang ila’ng land area ug ang income sa panagana nga daghan na unya’ng investors ang mobubo og puhunan sa ila’ng lungsod.
Ang lungsod adunay P80 milyones nga income matag tuig apan kung ang daku’ng proyekto ang hinay-hinay na’ng mapuslan hayan kini doblehon pa ug mopasar na sa income requirement nga mahimo’ng siyudad. Matud sa mayor nga dili na lang sila magdahum nga makapasar sa total land area.
Ang tinguha giingong suportado ni Kongresista Gerald Anthony Gullas sa una’ng distrito sa lalawigan sa Sugbo nga gilangkuban sa tulo ka siyudad sa Talisay, Naga ug Carcar, samtang tulo usab ka lungsod sa Minglanilla, San Fernando ug Sibonga. (BANAT NEWS)