CEBU, Philippines - Bisan gibuksan na pagbalik ang One Citilink Terminal, wala gihapon namalik ang mga stall owners ug V-Hire tungod kay nagpaabot sila nga pabalikon ni Mayor Michael Rama.
Matud ni Rex Baldonado, vice chairman sa Toledo V-Hire Transport Cooperative, nga dili sila mopahawa sa temporaryo nga terminal sa luyo sa La Nueva Supermart.
Dugang ni Baldonado nga ang pagsunod sa mando sa mayor isip respeto kaniya ug sa kagamhanan sa dakbayan.
Tungod usab niini mapasalamaton sila nga mga V-Hire operators nga gihatagan sila og temporaryo nga terminal kun diin nakapahiluna sila og tarung.
Gitug-an ni Baldonado nga gipahibawo sila ni Phillip Barrientos niadto’ng Miyerkules nga pwede na sila makabalik sa naandan nga terminal.
Si Dodong Primero sa iya’ng bahin nagkanayon nga nagpaabot lang sila kung asa gyud ang bag-o nga terminal samtang naluoy usab sila sa ila’ng mga pasahero tungod kay naglibog na kung asa sila makit-an.
Hangyo ni Baldonado ug Primero sa tag-iya sa Citilink nga kung momando na si Rama nga pabalikon na sila, buot nila nga mamahimo kini’ng exclusive terminal alang lang kanila ug dili pasudlan og mga libud-suroy ug katulgan sa mga tawo tungod kay mao kini ang nakadala og hugaw sulod sa terminal.
Si Rama mapasalamaton sa mga tag-iya sa V-Hire tungod nakita nila ang kaayuhan nga tumong sa mayor.
Buot sa mayor nga makigtagbo sa mga V-Hire operators ug stall owners. (BANAT NEWS)