Wiretapping makatabang vs illegal drugs

CEBU, Philippines - Mga tinugyanan sa balaod di makahuygo sa kampanya batok sa mga sindikato sa ilegal nga drugas gumikan sa kakulang sa mga gamit ug mga pamaaging gidili sa balaod.

Ang direktor sa Philippine Drug Enforcement Agency (PDEA)-7, Jeffrey Bangsa nagkanayon usa ka hagit kanila ang limitasyon sa kapabilidad ug sa mga gidili sa balaod.

Usa na niini sa gidili kanila ang pagpahigayon og wire tapping sa mga linya sa komunikasyon sa mga gidudahang drug suspects. Iyang gipasabot nga pinaagi sa wire tapping ang gobiyerno makakuha og mga impormasyon batok sa mga big time drug personalities aron sila mangadakpan.

Matud usab niya nga ang maong pamaagi gigamit sa ubang nasud nga dunay mga problema usab sa ilegal nga drugas.

Sa report sa The Philippine Star sayo ning bulana, giaprobahan na sa ikaduhang pagbasa sa Ubos Balay Balauranan ang House Bill 6107 o ang “Act Authorizing  Wire Tapping in Cases Involving Violations of Republic Act 9165 otherwise known as the Comprehensive Dangerous Drugs Act of 2002.”

Kun mahimo kining balaod, aduna nay otoridad ang mga law enforcement units pag-wiretap sa mga tawong gidudahang nalambigit sa ilegal nga drugas.

Ang kasamtangang balaod sa Anti-Wire Tapping Law nagtugot lamang sa gobiyerno nga mo-wiretap sa mga personalidad nga nalambigit sa rebelyon, pag-alsa batok sa gobiyerno, espiya ug uban pang kaparehas nga krimen.

Apan bisan sa maong kakuwangon, si Bangsa mipahibalo sa Regional Peace and Order Council nga sukad sa buwan sa Abril hangtud sa Agosto niining tuiga mikabat sa 2,730. 74 ka gramong shabu ang ilang nasakmit.

Karong bulana lang nakalarot sila og 26,958 ka punoan sa marijuana ug 1,200 ka gramong seedlings niini ug nakapahigayon sila og 58 ka operasyon batok sa ginadiling drugas ug 58 usab ka tawo nga nalambigit niini ang ilang nasikop.  (BANAT NEWS)