Mananagat gikan sa Negros gidakop

CEBU, Philippines - Siyam ka mga mananagat nga taga probinsya sa Negros Occidental ang gidakop sa kapulisan sa lungsod sa Tuburan tungod kay nangisda sa kadagatan sa maong lungsod.

Ang mga nadakpan mao sila si Noe Narcisco, 37, kapitan sa panagatan, Jason Olbina, 29, Mark Gabriel, 39, Edgardo Narciso, 30, Jojo Chavez, 36, Jomarie Baruc, 21, Tiwi Sercado, 41, Rejie Sercado, 35 ug Elmar Sercado, 29, pulos nagpuyo sa Palanas, Escalante, Negros Occidental.

Ang siyam sakay sa F/B Allannea nga nanagat sa Tañon strait, nga naggamit og “Zipper” usa ka matang sa pukot nga pino og mata.

Ang mga sakop sa Tuburan Police nga nakadawat og impormasyon kabahin sa ilegal nga pagpanagat sa maong dapit ang daling misubay sa maong lugar ug nasakpan ang maong grupo.

Nasakmit sa kapulisan gikan sa bangka ang 13 ka kahon sa mga nagkadaiyang isda nga mikantidad og P20,000.

Ang panagatan wala makapakita og papeles kung aduna ba sila’y permiso nga managat sa maong dapit.

Tukmang kaso ang ipasaka sa kapulisan batok sa siyam ka mga dinakpan lakip na dinhi ang pagbayad sa multa. (BANAT NEWS)