DOH nangusog sa adbokasiya vs depresyon

CEBU, Philippines - Ang tuig 2014 maoy dunay pinakataas nga kaso sa hikog base sa talaan sa Vicente Sotto Memorial Medical Center (VSMMC) sulod sa milabay nga upat ka tuig.

Gani nahitabo kini sud lang sa unang unom ka buwan sa tuig 2014 diin miabot og 88 ka tawo ang nagkutlo sa ilang kinabuhi.

Mas daghan kini itandi sa 61 ka mga kaso niadtong tuig 2013;  91 sa tuig 2012 ug 28 gikan sa Agosto hangtod Disyembre sa tuig 2011.

Si Dr. Robert Cañete ang Medical Specialist II sa VSMMC nibutyag nga sagad sa mga naghikog nagpangidaron og 21-30 anyos ug sagad mga lalaki.

Nag-unang rason sa pagkutlo sa usa ka indibidwal sa iyang kinabuhi mao ang depresyon ug impluwensiya sa ginadili nga drugas.

Problema sa kwarta ug sa relasyon usab ang nakita nga rason sa depresyon nga nagtukmod kanila paghikog.

Matud pa ni Dr. Josie Ann Danes, ang medical officer IV sa Department of Health (DOH) 7, base sa kasayuran nga ilang nakuha gikan sa World Health Organization, ikatulo sa nag-unang rason sa tinubdan sa kamatayon mao ang paghikog.

Nakita sa pagtuon 15 ngadto sa 34-anyos maoy kadaghanan sa naghikog ug moabot na ngadto 875,000 ka tawo sa tibuok nasud ang naghikog matag tuig.

Dugang pa ni Danes, gipahimug-atan nila sa DOH ang pagpalapad sa paghatag og impormasyon aron matabangan ang mga tawong dunay depresyon.

Si Emmalyn Fernandez ang nurse ug Mental Health Coordinator sa DOH 7 nagkanayon nga gihingusgan nila ang adbokasiya sa suicide prevention.

Niadtong  nilabay nga Septiyembre 10, aduna silay gipahigayon nga forum ngadto  sa mga tinun-an ug magtutudlo  ug gipasabot ang mahitungod niini.

Gibasol usab ang ka moderno sa teknolohiya maong dunay mga kaso sa “copy cat” nga paghikog.

Sumala pa ni Cañete, atensyon maoy kasagaran gipangita aning mga tawo nga mosuon sa paghikog.

Awhag ni Cañete sa publiko nga mangita gayud og tawo nga kasuginlan sa ilang mga kahiubos ug dili tago-tagoon. (BANAT NEWS)