CEBU, Philippines - Usa ka nagpailang engineer ang gisikop sa kapulisan sa Mabolo Police Station atol sa entrapment operation human giingong nangilkil sa usa ka babaye nga negosyante diha sa F. Cabahug Street ning dakbayan sa Sugbo.
Ang gidakop mao si James Sy Fernandez, 32, ug ang iyang kauban nga si Evelyn Listones, 56, nga taga barangay Lahug.
Usa ka Evelyn Ytac, manager sa Chillout Resto Bar nga nahimutang sa maong dapit ang nidangop sa kapolisan.
Matud pa ni Senior Inspector Hartzel Peter Bellido, hepe sa Mabolo Police nga nahinabi sa Banat News ang modus sa suspek nga duolon ang mga negosyante ilabi na kadtong duna’y planong magtukod og establisamento.
Mopresentar kini sa iyang kaugalingon nga maoy motabang aron mapadali ang paggawas sa mga permit bugti sa saktong kantidad sa salapi.
Sumala pa ni Bellido, kapin sa P100 mil na ang nabayran sa biktima ngadto sa suspek apan wala gihapon ma-release ang permit maong nagduda na kini ug midangop sa kapolisan.
Nakuha gikan ni Fernandez ang usa ka .9mm pistol, PNPA Ball Ring ug ang budol money nga gigamit sa kapulisan.
Nasayran nga kanhi diay nagtrabaho si Fernandez sa usa ka construction company sa lungsod sa Carmen isip engineer apan kapin bulan na kini nga wa mosud sa trabaho, apan nahibaw-an usab sa iyang kanhi gitrabahoan gikan sa Professional Regulation Commission (PRC) nga wala sa listahan sa mga engineers si Fernandez.
Nasayran sab ni Bellido nga nagpatuo sab diay nga usa ka opisyal sa polis ang suspetsado nga nagdala sa ranggo nga Chief Inspector apan peke diay ang gisuot niining PNPA Ball Ring.
“Maayo moestorya magtuo ka og maninaw ka niya. Especially og nangita ka og makatabang sa imoha para lagi anang permit,” matud pa ni Bellido.
Nasuta usab ni Bellido nga di kawani sa Office of Building Officials (OBO) si Fernandez.
Kagahapong adlawa, dugang tulo ka mga biktima ang mitudlo sa suspek nga nailad niini, naglakip niini ang usa ka retiradong sundalo ug duha ang negosyante nga pulos gipangayoan sa suspek og tag kapin sa P100 mil matag usa. (BANAT NEWS)