CEBU, Philippines – Nagdasok kagahapon ang mga partisipante sa gipahigayong forum nga gi-organisar sa The Freeman/Banat News kabahin sa pagpangopya sa hinagoan sa uban diha sa ilang mga proyekto o sinuwat.
Tungod kay way balaod nga nagsilot sa “plagiarism” kon pagpangopya og mga impormasyon o balita dinhi sa Pilipinas, giawhag ang mga media practitioners ug mga tinun-an nga ibutyag sa ilang mga sinuwat kun asa gikan ang maong impormasyon.
Sa gihimong forum nga giulohan og “Cut and Paste: Plagiarism in the Internet Age,” ang mga tinun-an, mga magtutudlo, mediamen gipahinumdoman sa paghatag og importansya sa pagmugna og kaugalingon o orihinal nilang sinuwat o proyekto apan ilaha usab iapil og butang kun kang kinsa o asa nila gikan ang hinuwaman nilang ideya aron mapanindot ilang trabaho.
Mao kini ang pahinumdom nga gipaabot sa mga speakers nga sila si Atty. Adoracion Zare, sa Intellectual Property Office of the Philippines ug GMA News and Public Affairs assistant vice president Jaileen Jimeno kagahapon.
Matud pa nila, kay wa may balaod nga magsilot niining pagpangawat sa hinagoan sa uban, kinahanglan nga ang mga eskuylahan ug news organizations maoy moestrikto sa ilang mga sakop.
Napuno ug nagkuwang ang mga lingkoranan sa Marcelo Fernan Press Center tungod sa mitambong nga mga tinun-an sa kursong communication majors gikan sa University of the Philippines Cebu, University of San Jose-Recoletos, Cebu Normal University, Southwestern University, Saint Theresa’s College, University of San Carlos, Benedicto College. Ang mga sakop sa academe gihatagan og kahigayonan nga mohatag og reaksyon human sa diskusyon sa mga speakers.
Sila naglakip nila ni Prof. Mayette Tabada sa UP Cebu, Prof. Nestor Ramirez sa USJ-R, ug Mia Embalzado sa STC.
Ang maong forum, gi-sponsor sa Primary Homes, Mactan Rock Industries, Pilipinas Water Resources Incorporated isip kabahin sa mga kalihokan sa Cebu Press Freedom Week 2015. (Gikan sa The Freeman/EIM)