CEBU, Philippines – Kapin sa 30 ka nasakmit nga video karera ug mole-mole machines sa kapolisan sa Mandaue gipangguba kagahapon pinaagi sa pagbunal og maso. Si SPO3 Kerwin Bejer miingon nga 36 ka video karera ug mole-mole ang ilang gibungkag. Kini nasakmit sa nanglabay na nga katuigan.
Nahukman ni Mandaue City police director Mariano Natuel Jr. nga gub-on na lang ang mao nga kahimanan sa ilegal nga sugal kay ang mga kaso niini naresolbar na sa hukmanan.
Matud ni Bejer nga nakasamok kaayo sa ilang bodega ang maong video karera machine ug mole-mole.
Sa laing bahin, didto sa Barangay Poblacion, Compostela nadakpan sa kapolisan ang usa ka Rodulfo Tinco, 44, nga nagpuyo sa maong dapit ug nasakmitan kini og mga ebidensiya nga naglakip sa mga tally sheet ug P131 nga gituohang halin sa maong ginadiling sugal. – /RUB) (BANAT NEWS)