Mga naguba nga simbahan giayo na

CEBU, Philippines – Upat ka simbahan sa Bohol nga naguba sa 7.2 magnitude nga linog niadtong Octobre 15, 2013 gisugdan na pag-ayo sa National Historical Commission of the Philippines.

Kini maoy gitug-an ni Rev. Fr. Milan Ted Torralba, pangulo sa Commision for the Historical of the Church sa Diocese of Tagbilaran.

Matud ni Torralba, adunay pipila ka simbahan sa Bohol nga gideklarar sa gobiyerno isip national cultural treasure, national historical landmark ug important cultural property.

Base sa maong deklarasyon, dunay cultural agency sa gobiyerno nga gitahasan sa pag-restore sa nangaguba nga simbahan sa nasud tungod sa linog.

Sumala ni Torralba nga adunay mga simbahan nga nasugdan na sa pag-ayo gamit ang kuwarta sa kagamhanan sama sa mga simbahan sa lungsod sa Baclayon, Dauis, Loay ug Tubigon.

Matud sa pari nga ang mga parokyano nahinangop kaayo pagkakita nga gisugdan na g’yud ang pag-restore sa mga nangaguba nga simbahan.

Si Torralba miingon nga ang kadagkoan sa simbahan igo ra nga motan-aw sa pagpabalik sa naandang sitwasyon sa simbahan kay ang kuwarta dili man gikan kanila. – /RUB) (BANAT NEWS)