Mga iro sikupon

CEBU, Philippines – Hingusgan sa kagamhanan sa dakbayan sa Toledo ang pagdakop sa mga libudsuroy nga mga iro tungod sa peligro nga dala niini ngadto sa publiko.

Kini ang gisugyot ni Konsehal Marjorie Perales human nga plano sa dakbayan ang pag-abaga sa mga  balayrunon ilabi na paghatag og anti-rabies nga tambal sa mga mapaakan og iro.

Nasayran nga adunay mga namuhi og iro nga pamuhian lang ang ilang binuhi ug kini gipanglantawang peligro sa publiko kun makapaak.

Usa sa gisugyot mao ang pagpahigayon og mga seminars alang sa hustong pagbaton og mga binuhing mananap sa urban areas sama sa siyudad. Himuon kini nunot sa planong paggahin sa siyudad pinaagi sa City Health Department nga abagahon ang anti-rabies vaccine alang sa mga napaakan og iro.

Sa dakbayan sa Toledo niabot na sa 1,648 ang natala nga napaakan sa iro sukad niadtong 2014.

Diin matag pasyente magkinahanglan og labing menos P3,500 alang sa anti-rabies vaccine. Ang rabies usa ka matang sa sakit sa iro, iring, ug kabog nga makamatay sa maong mga mananap sud sa pipila ka adlaw. Ang matakboyan niining mananap mausab ang kinaiya ug mamahimong bayolente ug mamaak.

Kadtong dunay rabies nga mananap makatakod tungod laway nga mosud sa samad. – /EIM) (BANAT NEWS)