Tawo namatay nabanggaan sa motor
CEBU, Philippines – Lalaki nga milabang sa karsada didto sa Minglanilla nabanggaan og motorsiklo nga maoy nakaingon sa diha-diha niya nga kamatayon tungod sa pagkapantok sa iyang ulo sa semento.
Si Rene Macapobre, 50, taga Barangay Pakigne, Minglanilla wala makabantay sa nagsingabot nga motorsiklo diha nga milabang siya sa karsada didto sa Barangay Lipata kagahapon sa buntag.
Ang drayber sa motorsiklo nga si Ruel Rubio, 25, taga Tabunok, Talisay City, mitug-an sa kapolisan nga misuway unta siya paglikay apan naabtan gihapon ang biktima.
Si PO2 Niki Carlo Plarisan, desk officer sa Minglanilla Police Station, miingon nga napantok ang ulo ni Macapobre sa konkreto nga karsada ug maoy nakaingon sa iyang kamatayon.
Gidala pagdali si Macapobre sa Minglanilla District Hospital apan gideklarar sa doktor nga patay na siya’ng daan sa wala pa mahiabot sa ospital.
Si Rubio gitanggong karon sa kapolisan ug gipaabot pa kun magkasabot ba sila ug ang biktima nga dili lang mopasaka og kaso sa hukmanan. – /RUB) (BANAT NEWS)
- Latest
