CEBU, Philippines – Gilubong na kagahapon ang 17-anyos nga kolehiyala nga si Karen Kaye Montebon nga gipatay sulod sa ilang balay sa Conrinthians Subdivision, dakbayan sa Lapu-Lapu sa miaging semana.
Gibana-bana nga kapin sa 1,000 ka higala sa biktima ang mihatod sa iyang patay’ng lawas didto sa Mactan Island Memorial Gardens sa Barangay Marigondon alas 2:45 sa hapon.
Si PO3 Nelson Nuñez sa Basak-Marigondon Police Station 4 nagkanayon nga apil sa mihatod ni Montebon mao ang iyang mga kaklase sa University of San Carlos (USC).
Emosyonal kaayo ang mga pamilya ug suod nga kahigalaan sa dalaga diha nga gitunod na ang iyang patay’ng lawas sa lubnganan.
Si Diane, 21-anyos ug kamaguwangan sa magsuon, mipabuhagay pag-ayo sa iyang mga luha atol sa Eulogy service didto sa St. Peter's Funeral Homes sa Mandaue.
"I would miss our OOTDs (outfit of the day) together. This might be hard to accept, but even the darkest tunnel, we can get through it. Karen, my baby love, my sisterette, always remember that you are loved," matud ni Diane nga nagbakho.
Ang mga higala ni Montebon, pulos nangita og hustisya sa kamatayon niini ug nagsul-ob sila og itom nga sinena nga gimarkahan og "Justice" ug “JUSTICE for Karen Montebon.”
Gusto unta sa mga higala ni Montebon nga masikop na ang mga nagpatay sa biktima.
Ang hepe sa Lapu-Lapu City Police nga si Senior Superintendent Armando Radoc miingon nga aduna sila’y laing tulo ka "persons of interest" nga gituohang nalambigit pagpatay ni Montebon.
Sayo pa, mag-live-in partner ang gitan-aw sa kapolisan nga mga suspek sa pagpatay ni Montebon apan na-clear ra usab ang duha.
Gibutyag ni Radoc nga aduna sila’y nakuha nga footages sa duha ka tawo gikan sa close-circuit television cameras (CCTV) sa usa ka pribado’ng balay. – /RUB) (BANAT NEWS)