Nganong way nadakpan?

CEBU, Philippines – Paimbestigaran ni Bise Mayor Edgardo Labella sa dakbayan sa Sugbo kun nganong way bisan usa ka tagbalay nga nadakpan ang kapolisan gikan sa 12 ka panimalay nga gironda tungod sa pagpayuhot og ilegal nga drugas diha sa barangay Duljo Fatima kagahapon sa kaadlawon.

Si Labella  mao usab ang pangulo sa Police Coordinating and Advisory Council sa dakbayan gustong paesplikaron ang kapulisan bahin niini.

Ang bise mayor kinsa padung sa biyahe sa nasud sa Belgium nga nakahinabi sa Banat News nagkanayon nahibulong siya bisan ang tag-iya sa balay walay nangadakpan diin nangakuha ang ilegal nga drugas. Sumala pa niya, kinahanglang seryuso unta ang kapolisan sa kampanya batok sa ilegal nga drugas pinaagi sa pagsikop sa mga nalambigit niini.

Mibahad si Labella nga kung masuta nga dunay kalambigitan ang mga tag-iya sa panimalay sa pagpamaligya sa mga illegal nga drugas, angay silang kasohan.

Gusto ni Labella ipasusi ang tanang mga close circuit television cameras nga gimuntar diha sa mga agianan sa maong dapit nga tuyo nga gitaod sa mga residente kun gigamit ba nila kini aron panid-an ang kapolisan.

Samtang si Kapitan Elmer Abella sa maong barangay sa iyang bahin nalipay sa maong operasyon sa kapulisan. – /EIM) (BANAT NEWS)