Di pa tanan LGUs nipatuman sa SWM program

CEBU, Philippines - Gipahinumduman sa Kapitolyo ang mga lokal nga kagamhanan sa pag-implementar sa solid waste management program.

Ang kagamhanan sa probinsiya nigahin og P26.3 milyones alang sa pag-establisar sa Material Recovery Facilities (MRF) sa mga local government units.

Ubos sa Ecological Solid Waste Management Act o ang Republic Act 9003, ang LGU gihatagan og mandato sa pagbutang og MRF ug paghimo sa 10-year Solid Waste Management Plan subay sa National Solid Waste Management Framework.

Sa gipahigayong Solid Waste Management (SWM) Board meeting niadto’ng Septiyembre 4, si Atty. Chad Estella, pangulo sa Provincial Environment and Natural Resources Office (PENRO), nibutyag nga pipila lang ka LGUs ang ni-implementar sa programa.

Matud niya nga 14 ka LGUs lang ang adunay functional nga MRF nga naglangkub sa lungsod sa Cordova, Barili, San Francisco, San Fernando, Argao, Balamban, Santa Fe, Medellin, Dalaguete, Poro, dakbayan sa Mandaue, lungsod sa Liloan, Moalboal ug Asturias.

Samtang nikabat usab sa 12 ka LGUs ang nakaduso na sa ila’ng 10-year SWMP.

Kini ang lungsod sa Pilar, dakbayan sa Toledo, lungsod sa Cordova, Oslob, dakbayan sa Mandaue, lungsod sa Ginatilan, dakbayan sa Sugbo, lungsod sa Boljoon, dakbayan sa Naga, lungsod sa Sogod, Minglanilla ug Santander.

Base sa record sa PENRO, adunay mga LGUs nga may landfills apan wala kini nila gamita.

Kini sama sa dakbayan sa Toledo ug lungsod sa Balamban kinsa dunay mga landfills apan padayun gihapon kini sa paggamit sa ila’ng open dumpsite.

Samtang ang lungsod sa Minglanilla ug mga dakbayan sa Naga ug Carcar nikontrata kini og pribado’ng kompaniya nga mao’y nag-proseso sa ila’ng mga basura.

Sa laing bahin, lima ka LGUs nga gilangkuban sa lungsod sa Malabuyoc, Boljoon, Tuburan, Santa Fe ug San Remigio ang nakahuman na sa ilang Waste Analysis and Characterization Study (WACS).

Ang WACS usa ka paagi nga gamiton sa pag-identify sa physical ug chemical properties sa basura pinaagi sa sampling ug analysis nga basehan sa waste management.  (BANAT NEWS)